但 手搓麵包實在太困身 夏天都要用上2個多3個小時去搓粉、發酵......而且完成所有發酵程序後唔可以等 要即焗 以免發酵過度 而且發酵亦都隨住唔同既天氣而變得好唔穩定 造一次都真係要花好多心機精神同時間
當時亦有留意市面上既麵包機 先睇價錢 大約1000多2000元 C9地諗 2000元一個麵包機 其實去Panash買麵包都係10多左右1個 2000元其實我可以買到好多個又好味又多款 以我當時既資料 麵包機只可做方包 即使自己做麵包 2000元我做幾多次先翻本呢? 都係放棄左繼續堅持得閒手搓 但只堅持左2個月左
就係上個月左右 突然又想自己做包 但一諗到已經係冬天啦 夏天時我手搓既粉都唔係搓得好 而家冬天相信發酵難十倍 點好呢? 又諗起"麵包機"呢個機器 突然諗 可唔可以用麵包機做發酵既程序 用麵團再配合光波爐整呢? 於是就開始認真地睇資料 search到panasonic一致好評 雖然係我search過係最貴既品牌 但 都唔慳果幾百元啦 最緊要質素穩定又好食 我對麵包都有1定既要求架
之後鎖定左品牌目標再係各討論區同麵包群組度研究 原來好多人都唔買行貨而買水貨 以105為例 行貨有19個預設模式 而台灣同日本水貨既105係有30個模式 價錢行貨係最貴tim 有點過份
日版 價錢最平 千多元便成交 但要加火牛 而且版面及說明書都係日文 用時好不方便 唔岩我呢d事事要方便同快既懶人 好快就知唔駛諗呢部
港版 價錢最貴 但購買方便 有維修 黑仔如我係好實際要考慮既野 但 比左最貴既價錢 功能上係最入門既版本 有點搵笨
台版 價錢中等 要加火牛 經代購入再加火牛其實同行貨價差不多 但 功能上專業好多 日台版同港版在實用上最大既分別係 台版有"輕攪拌" "延長發酵" "獨立烤焗" "半磅麵包pan" "用生種酵母"......做麵包既彈性大好多 功能亦強好多
但最終都係選擇左港版 1. 方便唔駛煩 2.有保養 3.唔駛拖隻大牛 我可以放既地方已經夠細 唔想再side更多位
考慮左咁耐先買 另一原因係老公都對麵包機由初 既無所謂 可有可無去到有興趣 因為佢開始聽聞係街買既麵包係落好多唔健康既野令佢變軟同令包包放幾日都仲軟 買左機2日 佢去超市買野見到方包就過去睇下成份 wo....好多一睇就知唔好既乜劑乜劑加左入去 所以更加覺得入麵包機係絕對正確
