oscar----林勇行醫生 12w4d

陳醫生refer左我地去林醫生度照oscar 佢話林醫生係照oscar既權威  佢睇得好準  而且亦都可以睇埋性別  其他醫生係呢個階段只有7成準  但佢係有成9成準

好緊張.....因為呢1關對小b黎講都係1個大考驗  mummy已高0啦 所以出黎既數據  真係好驚會變左高危 

約左10點  9:30已收到護士電話叫我地1定要準時  我果刻真係驚驚地  因為我仲係屋企 即刻叫老公啦啦聲去攞車  仲要行得好快咁上去醫務所  上到去都等左成30分鐘先入去  果刻覺得自己on居左  仲乜辛苦自己咁樣趕法? 

林醫生既醫務所好大裝修亦唔錯  護士亦都好有禮貌好nice  但果度好多大6人  嘈到爆 

 

今日王小b已經有5.43cm啦  又大左dd  林醫生照得好快  好快搵到要搵既地方  只係碌左2下  就同我地講  呢個係仔黎架  再睇左頭、腦、手、腳、腎、肺、最重要既度頸皮  1.0幾mm  林醫生搵得好快.....講解亦都好快  好辛苦先zip到個位入去問醫生最重點既問題  小b既鼻骨是否正常  全程大約照左5分鐘  當當完時護士幫我清理時 醫生講左句一陣護士會幫我抽血就離開左啦

 

 

有人問.....林醫生nice嗎? 細心嗎?  講解詳盡嗎?  好唔想揀佢照oscar?  因為我之前已經上網search左comment  一早已經知佢比較cool  照得好快  唔會長氣  但佢係呢方面既權威  搵好快、睇亦都好快  只係好有經驗同信心既醫生先得  所以我都唔介意佢會唔會好似其他醫生咁起碼照成20分鐘有問必答 (其實佢又唔係唔答我  係佢快到我無機會問問題者)  我既要求係...最緊要睇得準仍  佢話左比我聽一切正常  我就已經好開心啦  重點係..."好好呀"  "正常" "岩哂"..........

 

開心完又到我驚既時候啦.....抽血   個護士都好nice  手勢亦都ok 桔入黎果野痛1下  好快手搞惦  老公係係我隔離比我捉住隻手  我好緊張  本能反應緊係渣實佢啦  佢一feel到我渣實就同我講  未呀  未抽.....講左成4 、5次  煩到爆   同日  老公新公司亦都要做身體檢查陪佢去左抽血 

 

 

王小b、daddy mummy下1次既大關  就會係20weeks既照結構  希望小b要努力.....一切要順利呀  

 

 

 



產檢----st paul 方敏豪 12weeks

一直睇開陳志慧 一心亦諗住搵佢跟到落尾  但  陳醫生只係係養和同嘉諾撒掛牌  係weeks 8時已經決定去養和生  但.....護士1 check之下 已經無位囉  真係10個頂  咁早都無  之前仲諗緊係米真係要weeks8落訂 而家真係乜都唔駛  其實真係好唔想去嘉諾撤  地點遠又麻煩 好唔方便屋企人  同埋記得幾年前去探過朋友.......果度好舊   同埋......之前去過養和做手術  佢地既環境同埋護士令我覺得好好 好體貼  我唔知道嘉諾撤既護士會係點  無乜安全感  我認我係一個好麻煩既人  勁怕痛需要人地既關心同埋耐性  綜合種種原因  就嘗試搵另1熱門醫生  st paul註院醫生方敏豪  佢既好處除左手勢被各jm大讚外  跟佢.....我都仲可以考慮我順產定開刀  跟陳志慧就一定要開刀  

因為佢都係1個好熱門既醫生  約初次見面都排左1個月左右  因為唔想再請假產檢  所以揀左星期六5:50  因為係醫院裡面  一去到先係分流站探熱同量血壓  果位護士都幾惡死  咁我唔知佢地既程序麻  佢講野完全無尾聲地叫我呢樣果樣  之後佢比左張tester我去驗尿  咁我未試過麻  米問清楚點做  佢好似無我咁好氣咁答我   相反登記班護士有禮貌好多  登記完就去洗手間驗尿  唔入由自何  睇佢外在係ok好似好新好乾淨  一入到去.....一陣臭味  廁所水亦沖唔去裡面既紙巾  黎到呢度.....我真係唔鐘意呢間醫院  再拎番個tester去比惡護士檢查  佢黑住面寫左張紙比我叫我比醫生睇  咁....我知係驗血糖同蛋白  我都想快d知有無事麻...米問佢囉  佢就bear住我話"已經寫左啦 無事呀"  咁我又唔係護士點知你寫乜者?  一路等醫生同埋老公泊好車黎搵我  一路係度諗  生既時間要係度住5日4夜  如果要對住呢d護士咁多日  我真係唔太想 

行到醫生房前   我係排第6個  好似唔多  但1等就等左2個幾鐘  係輪到我既時候  仲唔知乜野原因比左個帶住小朋友既父母入左去先  乙等乙肚餓  同埋.....下午帶左班米飯班主去左童夢城出outing已經好攰唔多舒服  真係辛苦到想喊  又肚餓播  好後悔唔出去丹麥買個漢堡包食

8:20終於到我地啦   方醫生係一個好nice既醫生  令人地心情都好易放鬆  我亦都好直言咁話我已經同將會去做乜野檢查跟開邊個醫生  佢都無乜特別 

跟住就訓上床度同王小b見面既時間啦  每次都好緊張  好緊張佢有無長大到 

 

方醫生碌左幾下  就見到王小b係度不斷跳舞  醫生都話佢好精靈   從好處想都好既.....即係証明佢健康  一直都好擔心我呢個準媽媽身體唔好會連累佢  聽完醫生咁講  可以暫時鬆口氣  之後方醫生叫我地睇......原來小b已經有性器官長出啦  佢話買我9成係仔  我見到果刻呆左  嘩.....駛唔駛咁明顯呀?會唔會大得誇張左少少呢?  可能佢咁合作比我地見到既原因係....叫我唔想再想係女啦  佢係仔仔  睇bb野就睇藍色唔好想睇粉紅色  你放心啦  唔理你係仔定女  媽媽都一樣會咁愛你架  你都要愛媽媽  要身體健康  努力咁吸收多d營養  足月先好出黎同我地見面呀  ok?

 

開心完後就出去等比錢  醫生比左5張小b既相我地  今次產檢既收費係480元  我同老公第1個反應係....咁平?  我地平時睇陳醫生都要1200一1次  當中醫生費都600元  方醫生產檢真係收得好平但應該唔會揀佢啦  因為每次產檢都要等2個幾鐘  仲要有時佢上左去左接生可能等得仲耐  同埋我對st paul醫院真係無乜好感   都係博1博去嘉諾擻生算

 

12weeks  4.87cm

 

 

 

 

 

害喜現象 WEEKS 10

終於捱過醫生所講最辛苦既weeks 7,weeks9啦  黎到今個星期  一直期望好日子快d來臨

今個weeks胃氣好多  雖然食得落但每次食完野都唔舒服  個口會變得酸、苦同臭  口水乙來乙多  加上呢3個感覺  真係好想嘔  食完野又變得好攰  好想即刻訓覺  當然啦  在職準媽媽係無可能  但當我覺得好唔舒服時  真係天旋地轉都會入去同老闆講想休息1陣 只要夠人的話  放假就多數係屋企  食完就訓   街....好唔想出   買野......唔想   食野.....都唔想  已經亂到7彩既屋企...唔想執  床...就成為我最好既朋友  

今個星期發現  飲左鈣思寶另1日  精神同害喜現象好似好dd 

25/3/2014 ---9weeks4第二次產檢

早係1個星期開始訓得好差 我諗應該係就快第2次產檢 好驚照唔到心跳所以訓得唔好

等左3個星期 終於到左見王小b既1刻 當上床時心跳加速 心諗 1定要照到心跳呀 10多秒黎 醫生就話見到心跳啦 果刻真係鬆左口氣

今次佢又長大左啦 醫生過見到有頭 ，身，2隻手，2隻腳 2.27cm 同埋今次終於肯定左係排卵遲左 雖然計係9wk 4但size應該係得8wk 6

突然 醫生好緊張咁叫我地睇個screen 佢話小b係度旭緊呀 我問醫生 吓 乜咁快就識旭架啦？ 醫生過呢個周數識 但唔會多 我見小b都旭得幾勁 突然諗 嘩 咁快就識旭會唔會過度活躍症架？ 但我知我衰 我應該係要諗 咁快識旭 係因為佢健康 醫生再補充話 呢個周數旭既時間唔多 今日比我地見到係我地好好彩 第1次見到佢旭既感覺真係覺得好奇妙 好感動

照完超聲波再決定揀醫院既事 醫生話今日要抽產前血 哈？ 我未有心理準備播 我好怕抽血 搞左1輪 護士比我唔即日抽 星期六先上去抽

好快又到星期六 上到去d護士都認得我。就係果位抽血要有心理準備既麻煩人麻 有幾位護士都入黎問我 駛唔駛訓低抽 怕我暈低扶唔到我 當然唔好啦 訓係度仲驚 開始啦 支針桔入時係0益左1聲 但護士手勢好好 其實唔痛亦好快

聽其他係政府做產檢既jm講 要抽5支血 我聽完即暈低 所以我唔打算番政府產檢 今次產前血都係700元 我比呢筆錢令自己舒服好過d就算 我係政府 應該會比護士鬧死果d
下次檢查時 會係另一關 驗oscar 王小b你要加油 努力過埋呢關

害喜現象 7weeks

由發現王小b既存在後  個人一直處於暈船浪階段  成日都會頭暈  企唔耐都無問題  但係會因為辛苦而隨時暈低  一至五好乖  放工返娘家食飯  再訓1陣就返屋企沖涼  10:30就頂唔住暈低係床到訓到第二朝  星期六日出街都係由小強陪伴左右 謝絕哂所有約會  我....出得街2個鐘左右就會暈低  企多過10分鐘都會暈 個口淡到令人作嘔作悶  完全唔想食野  輕左4磅 
食物方面  王小b應該鐘意食婆婆既餸  食得唔多但會食得落小小  水就完全飲唔到  只能靠有味飲品同湯水維生  以前好鐘意食既野會覺得好嘔心  食親外食都.....1次貨仔  永無下次翻撻既心  好野都唔想翻  真係百般滋味在心頭  只有試過害喜感覺既人先會明白  原來....要做媽媽既第1步都唔易行   唔知幾時先會好d?

第1次產檢---6weeks4

好緊張好緊張  自從棒棒確定左  但都不停話比自己聽  唔好開心得太早  因為之前不停係bk度睇資訊  知道3個月前自然流失既機會都好高  如果撞正粒卵子係唔靚 你點小心都留佢唔住  另外仲有什麼空心胎、化學懷孕........一日未照一日都唔好有希望住  因為太難得先有1個突如其來機會  如果無左  開心過後真係好難接受  

4-3-2014當訓上張床時就開始緊張 好驚乜都照唔到  等左1段長時間  醫生話已經有胎囊  有胎水  之後繼續係個肚度碌  又碌左好耐  氣氛仲乙來乙凝重  仲縐哂眉  等左好耐  佢終於開聲啦  因為佢原來1直搵緊心跳  佢發現有1個微弱似係心跳既位置  醫生話計番我係6w4  而家度左佢偏細  得5w6幾左右  機會有2個   1. 排卵遲左  2.發育不良  但醫生跟據我以往既period推算我係遲左排卵  但...都要3星期後再上去照時先confirm到 

望住呢張相  感覺都未真實  都係果句啦  呢3個月充滿無限變數  但 我都會照食同戒某d食物 要自己早訓  隨住感冒慢慢好番  害喜既感覺都乙來乙真實  真係好辛苦  行耐少少企耐少少都頭暈作嘔又反胃  口味8成都唔同哂  食又反胃唔食又反胃真係好惡頂   但 如果無左呢0的害喜徵狀米仲驚?  而家既心情真係好矛盾 

暫時不能說的秘密

 

由2月14日情人節放工  唔知係米之前1晚比人拉走張被  放工時已經發燒   1向溫度偏低既我  平時燒到37.3左右已經係算發燒  辛苦到全身骨痛  原來係別有內情  SL左2日  期間醒起親戚已經夠期黎探我  但  仲唔見既? 上個月就話同老公嘈左場大野搞到遲左10幾日者? 今個月無呀  開始擔心  唔係提早收經呀?  真係好驚 

持續個幾星期既感冒  以為退左燒但原來唔係  過左幾日後發現又再燒 仲要燒到39.4 天呀  我未試過燒到咁樣  第2個星期又多2日病假  唉.....比人炸型

病到溫溫鄧鄧  醒起遲左10日啦  唔係咁大獲呀?  我無乜幾何咁遲法  千其唔好係收經呀  雖然係高0但都會唔會早左D呀?  就係SL前1晚買左支棒驗  因為都費是SIDE錢所以買左支平平地既萬0版TEST下就算  反正最後結果都一如以往  白雪雪  當TEST既時候  可能都病到呆下呆下  成支棒反轉左黎用  但我只係淨番少許尿液  又開左無得留多陣  米用10滴都無黎TEST  等左1陣  我奇怪  點解會有2條線?  關唔關我病到運氣差  支棒都壞左? 定係太少尿液令支捧出現偏差?  心理面真係有十萬個為什麼?

    定1定神  SEND MESSAGE比老公同佢講  唔知係米知棒壞左  叫佢幫我買支CB試  好快  就出現左Pregnant  即刻叫老公睇問佢 咁快出現左 pregnant 呢個字 1陣會唔會加多個not架?  定係佢已經confirm左但未出到周數?  正當好疑惑時  就出現左2-3 

見到呢個情景  我地2個都唔敢相信  已經試左2年多  test親都係白雪雪  即使搵埋西醫玩左我大半年工都無返情況都係1樣   之後我拒絕左癲後  生活先逐步回歸正常  再搵左個朋友介紹既中醫去調理身體  其實只係為自己好  對生b都已經唔想亦唔敢去想  所以  我地決定第2日請病假  睇感冒加驗孕  入到間房醫生第1時間就恭喜我地  可能我地既反應都係麻麻  佢以為我地無plan  我圩答醫生  唔係唔想要  係我地未敢相信同未接受到眼前既事實   就係咁樣 而家我終於擁有1個暫時不能說的秘密

大阪追櫻之旅----6-4-2013

今日8:30起身  9:30出門口  第一站   大阪杯麵博物館

 

 

 

係大阪乘地鐵阪急塚線係池田站落車

免費入場  但如果要自己設計一個獨一無異既杯麵  只需要比350yen一個


係場館內影相既地方唔算多 睇左一陣 就開始自制杯麵
日清杯麵  當然係我最愛既雞仔啦 個筆筒有公仔比你照住畫

呢個就係我既  左手邊係我畫  右手邊係小強畫既

呢個係小強既  我一見佢畫完  我即刻問佢  你畫緊自己個樣? 個樣一樣都係勁惡
左面既係小強既自畫像  右手邊係我畫既三不像

 

畫完之後就可以由呢班幫我地加工啦 首先當然係入麵啦

之後話比呢班姐姐仔聽你想要乜野材料

可以揀4款同一種湯底 首選當然係揀雞仔樣既蛋啦

超鐘意雞仔 

 

行上二樓 原來有一個麵條制作體驗 見到真係想尖叫  可以著雞仔圍裙同戴雞仔帽  好鐘意呀 只可惜鐘意都無用  因為最少要一個月前bk先可以join  仲要係出自小強把口  唉....早響啦

之後就返返大阪站食我指定既lunch-----laudree
個環境好正

小強叫左前菜加主菜

我就揀左主菜加甜品

最後....就用叫左杯咖啡為呢一餐作終結

食完後原本諗住去大阪城同造幣局賞櫻 但出發前發現造幣局全年只開一星期  我地撞唔岩時間 而且今日又落雨  係呀...又囉  仲要都唔細  而且時候都不早  所以決定唔去 反正都應該唔慌影到乜野相  我就提議不如係大阪站各百貨公司濕平算 我同小強提議  佢覺得攰可以返樓上酒店休息下先  平日 佢唔會比囉 點都要跟埋我去 不過今日可能佢又攰佢又知我好想獨自行街  而且只係呢個範圍都應該唔會迷路  於是.....我就可以好爽咁享受我既2.5小時獨自濕平時間啦  其實呢.....我最想係去hep five果邊行  因為集合哂好多平日買開既日本牌子  但.....要行過去阪急果邊  其實都唔太遠不過落住雨又要搵路  時間亦唔多所以都係放棄 但而家好後悔唔去囉

到左5:00幾 返上酒店放低野休息陣  6:00又出發去難波果邊搵食
黎到大阪 當然要試下蟹道樂啦  但好full  要等到8:30先有得入

呢個時候又行下街搵下食咁啦  大阪名物----章魚燒

呢間都好似幾出名  但味道我自己真係覺得麻麻

呢支野....好好味  唔甜又好香提子味 

 

另一個好鐘意既人物  卡路叔叔  自細已經好鐘意食架啦 

 

未等到8:30已經好攰啦  見到蟹道樂另一分店  仲要唔駛等  即入去啦
我地叫左2個set
分別有蟹刺身、天婦羅.......

嘩 個set多野食到呢....真係好飽  我都食唔哂  我地兩個對蟹都無特別既偏好  所以我地都覺得....呢度出名可能係抵食囉 味道真係麻麻  真係試一次就夠啦 
全晚我覺得個set最好食既.....就係呢個水果 

食完之後又攰又勁飽  行都唔想再行  搭番jr返酒店算啦
返到大阪站  小強話不如去family mart度行下  我地搵左好耐  好唔容易先搵到點樣係百貨公司收哂情況下上去12/f  仲要上去露天地方行出去先會搵到  仲要....原來呢間係用英文招牌 係用日文  我地......係問左好多日本人先搵到
雖然話好飽  但見到哈根大師又忍唔住

搞到成11:00幾先返到上房  因為今日真係買得好興奮  所以涼都未沖就要影下今日戰利品

 

 

 

 

大阪追櫻之旅-----5-4-2013

 

今次終於都唔駛天未光就起身啦  7;15起身

  天氣都係陰陰地但都唔算差

搭的士落到機鐵站再去check in  其實係我地屋企去機場  最快會係呢個方法  重要係我地係香港站check in  可以唔駛早2個鐘到機場  2個鐘前到香港站都有時間淨

出機場中  天氣開始轉差  去到九龍站時0的雨係勁大粒  成個天黑哂  心諗唔係fa  千其米整埋閃電tim  朋友在whats app報料  當時係黃雨 

係機場度食完早餐 諗住慢慢行去gate30等上機啦 同小強講好開心唔駛搭無人架駛啦  小強話都唔知會唔會改閘口者? 點知突然收到cx whats app  改閘口至71? 頂  開口中  下次你唔好再講野 跟住見到塊板睇清楚係米真係改左  點知一check  原來連起飛時間都改埋  要呆坐多成個鐘

起飛時天氣已經好番好多啦  上到機  機長宣佈今日飛行時間係3.20小時  勁開心  原本係4個鐘我之前仲係度ee哦哦今日無啦啦要多個鐘  而家時間縮短左  真係好消息  
因為遲左小小online checkin  點知所有位都比人揀哂  所以出到香港站先攞位  真大獲  我要同小強分開坐  我隔離果位男士既古怪行為同表情  令我成程機都訓唔著  好在坐3.20小時渣

其實cx既飛機餐我不嬲都唔覺得難食 都放得入口呀 不過佢既甜品又縮左水啦 之前kitkat已經話佢縮水 今時今日仲要係一包自家制甜餅 算啦  我比既機票錢  主要都唔係買佢既食物   

 

飛到名古屋機場  過海關時個關員睇完我填既資料  佢用好懷疑既態度問我 今日係米真係去大阪  車.......我知我地係on居呀 去大阪走去飛名古屋  但大阪無位我地又想黎玩麻....你估我想咩?
為左方便搭車、搵路、娛樂......所以我地會租wifi方便搵資料
www.telecomsqrare.asia/# 每日大約港幣90元左右 都ok 全程只有去白濱某段路無訊號

跟住就要係機場坐近鐵去名古屋站轉新幹線  但.....我地衰左  我地用suica嘟入去上車  點知原來全車都係指定席  即應該係要買飛  ok啦買左我地亦都同職員講我地嘟左suica叫佢搞番惦  我地都以後佢搞惦先講ok  點知...佢係唔明囉  跟住再用呢張card就賴哂野啦

落左車  都要入一段路先到新幹線名古屋站  買飛時個職員問我地要唔要指定席  我地當時覺得係無需要  反正以前既經驗係比較闊落唔多人搭  無謂比多2000yen啦  點知......我地錯鳥......
車費  每人6100幾yen

架車停定後  omg  咁多人既? 好唔容易搵到2個隔離分開座既位  頂....呢架車只得頭頂可放行李  玩野咩....真係估佢唔到  結果  為左唔會整到我隔離果位日本人  我就座得好辛苦咁zip個喼係我腳前成粒鐘  中間有好多人不斷係走廊到行過我又要半座咁推番個喼入黎  之後有架餐車推過  我直頭要起身讓路比佢過  個個都望住  樣衰到呢?  最後....我比個喼放係我擺腳個位.....我就對腳就轉90度面向隔離位既小強咁坐  原來咁樣係最好既安排囉

新幹線到新大阪站  我地就轉車搭一個站到大阪站  今次揀左同個站差不多係0距離既酒店 落雨都唔駛淋濕既 hotel granvai osaka  上網訂房時  原本都係一心想bk最平果隻房  唔係semi double應該都唔會太細  點知小強縑人地個窗好細好壓迫喎  就bk左而家呢間房  睇酒店資料話係一間20平方米既房  諗住都係大房啦  點知入到去....真係0左咀  細到呢.....我諗係我地住咁多間日本酒店最細既一間   我地係度住左4日 每晚平均要16000yen一晚 咁既size真係貴囉

但又咁講  下次再黎大阪我應該都會住返呢間....因為實在太方便  被幾間百貨公司包圍住  又有大型地下商店街  唔駛淋雨出去都可以濕足一日  都幾爽  但下次我未必會bk番呢個grade既房  反正都係細  我bk最平果隻吧啦

行到攰攰地  可以用房呢個腳部按摩器relax下

經過班機delay、搭飛機同新幹線再去checkin後  搞惦哂都成8:00幾  唉....可憐既我....而家先係正式既第一餐  因為飛機餐我上機時唔多舒服無胃口食  到落機後就不斷趕車
我地係大阪站坐車去難波  食同事介紹話必食既"一蘭拉麵"

呢度真係好多人.....我地排到九點多先入到去

 

嘩....排咁耐都值架....真係好好味囉  個湯底好香又濃  個糖心蛋係勁好味  唔知係米太肚餓  一路食一路好感動

之後再係周圍度行下街  經過便利店就探下我最愛既日本限定"哈根大師" 呢個新到香港都未見過

經過全日又搭飛機又趕車真係攰到發癲  攰到行左一陣已經0益要返酒店啦